جموں و کشمیر میں اسمبلی چنائو جلد، ریاستی درجہ کی بحالی مناسب وقت پر: ایل جی

جموں// جموں و کشمیر کے لیفٹیننٹ منوج سنہا نے پیر کو کہا کہ جموں و کشمیر میں اسمبلی انتخابات کیلئے حدبندی سمیت تمام تیاریاں مکمل کر لی گئی ہیں اور جلد از جلد اسمبلی انتخابات ہونے جا رہے ہیں۔
اُنہوں نے کہا کہ جب وزیر اعظم یہاں آئے تھے تو انہوں نے یہ بھی کہا تھا کہ جلد از جلد انتخابات ہوں گے، وزیرِ داخلہ نے بھی لوک سبھا میں الیکشن کرانے اور ریاستی درجہ کی بحالی کا وعدہ کیا تھا۔
لیفٹیننٹ گورنر نے انڈین ایکسپریس کے ساتھ ایک خصوصی انٹرویو میں کہا کہ الیکشن ہونے ہیں۔ جب پارلیمنٹ میں جموں و کشمیر تنظیمِ نو ایکٹ پاس ہوا تو وزیر داخلہ نے تین مخصوص باتیں کہی تھیں پہلی، حد بندی۔ لوگ اکثر سیاسی الفاظ میں اس کا اظہار کرتے ہیں۔ لیکن حقیقت یہ ہے کہ حلقہ بندیوں کے بغیر انتخابات نہیں ہو سکتے۔ سرحد کا تعین کون کرے گا؟ جموں و کشمیر حکومت نہیں کر سکتی۔ اور یہ ایک طویل عمل ہے، جس میں سٹیک ہولڈرز کی مشاورت کی ضرورت ہوتی ہے۔ جسٹس رنجنا ڈیسائی کی قیادت میں حد بندی کمیشن تین بار جموں و کشمیر آیا۔ سیاسی جماعتوں نے بھی دہلی میں کمیشن سے ملاقات کی اور حدبندی کی حتمی رپورٹ شائع کر دی۔
اُنہوں نے کہا کہ وزیرِ داخلہ نے لوک سبھا میں حدبندی کے بعد اسمبلی انتخابات کرانے کا وعدہ کیا تھا، الیکشن کمیشن اب یوٹی کا دورہ کر رہا ہے۔ جب وزیر اعظم یہاں تھے تو انہوں نے یہ بھی کہا تھا کہ جلد از جلد انتخابات ہوں گے۔ الیکشن کمیشن تاریخوں کا فیصلہ کرے گا۔ انتخابات پر کوئی شک نہیں ہونا چاہیے۔
لیفٹیننٹ گورنر نے کہا کہ لوک سبھا میں وزیرِ داخلہ نے تیسرا وعدہ ریاستی درجہ کی بحالی کا کیا تھا۔ حکومت مناسب وقت پر اپنا وعدہ پورا کرے گی اور ریاستی درجہ کی بحالی عمل میں لائی جائے گی۔
ایک اور سوال کہ شہری بلدیاتی اداروں اور پنچایتوں کے انتخابات کے بارے میں کیا خیال ہے؟، لیفٹیننٹ گورنر نے کہا، ـ” ہم نے تین درجے کا نظام نافذ کیا اور اسے مختصر وقت میں بااختیار بنایا۔ ضلع ترقیاتی کونسلز اور بلاک ڈولپمنٹ کونسل کا ضلع کیپیکس پلان بنانے میں اہم کردار ہے۔ ڈی ڈی سی کے لیے انتخابات 2020 کے آخر میں منعقد کیے گئے تھے۔ جموں کے ساتھ ساتھ کشمیر کے تمام اضلاع میں ڈی ڈی سی کونسلرز موجود ہیں۔ لیکن پنچ اور شہری بلدیاتی اداروں کی میعاد ختم ہو چکی ہے۔ یہاں او بی سی کے لیے کوئی ریزرویشن نہیں تھا۔ جموں و کشمیر تنظیمِ نو ایکٹ کے بعد بہت سے او بی سی اور ایس ٹی کو ریزرویشن ملا ہے۔ مخصوص نشستوں کے بارے میں بہت سی نمائندگییں تھیں جنہیں ریزرو کرنے کی ضرورت تھی۔ ہمیں اسے حل کرنا تھا”۔
ایل جی نے مزید کہا کہ لوک سبھا انتخابات سے ایک ماہ قبل، ایک ریٹائرڈ جج کمیٹی قائم کی گئی تھی تاکہ ان سیٹوں کی نشاندہی کی جا سکے جنہیں ریزرو کیا جانا چاہیے، اس لئے اسمبلی انتخابات کے فوراً بعد پنچایتوں اور بلدیاتی اداروں کے انتخابات بھی کرائے جائیں گے۔